【明報專訊】勞工界酒會噚日喺北角一間酒樓舉行，社民連、職工盟一如往年到會場外示威，今次激烈到保安要閂門，阻止佢哋進入會場示威，結果令一眾遲到嘅嘉賓一度未能入內，包括工聯會會長吳秋北。

社民連梁國雄、吳文遠，職工盟李卓人等十幾人噚日示威，批評特首林鄭月娥背棄勞工、不斷拖延標準工時立法，形容無心情同林太慶祝，去示威係要求林太正視工人訴求，立即就標準工時立法，還打工仔一個公道。

社民連示威一向較激烈，噚日更想入會場內向官員當面示威，現場保安阻止，結果搞到閂門禁止佢哋入內。Emily聽有份示威嘅吳文遠講，梁國雄拎住張500蚊紙示威，係要諷刺林太曾經畀500蚊乞兒，但過去就一直虐待工人、削減長者綜援福利。