【明報專訊】醫管局總辦事處人力資源主管彭飛舟上任近兩個月，噚日同傳媒茶敘分享心得。佢發覺「嬰兒潮 」一代嘅醫生較多以工作為重心，現今年輕醫生就勤力亦注重生活多元化，兩代人嘅溝通方式開始變。
質疑違反勞工條例
佢透露近日有畢業一兩年嘅醫生不滿周末受訓，任職跨國公司高層嘅媽媽去信醫院幫佢出頭，質疑上司違反勞工條例。彭笑言「呢一輩嘅supervisor(上司)要處理埋阿媽」。
彭飛舟話以前嗰代嘅醫生師徒關係好強，例如瑪麗醫院外科醫生結婚都問過部門主管，佢讀醫時亦因著咗無鞋帶皮鞋上病房，當場被要求除鞋，成對鞋畀教授丟出房外。隨着年代唔同，呢種師徒關係都慢慢轉變。不過，佢覺得年輕醫生嘅意見都可以令管理層喺設計課程時，考慮可否改為半日制，作出平衡。
佢又話，未來會透過調查，收集約20至30歲嘅前線醫護意見，了解合適嘅溝通模式。
;)
