【明報專訊】立法會前日(10日)三讀通過林鄭政府上場後首份《財政預算案》，只得11票反對票，係10年新低。民主派中，公民黨同議會陣線反對，民主黨7人棄權，專業議政莫乃光、梁繼昌和李國麟投贊成票，葉建源棄權，邵家臻缺席。議會陣線朱凱廸噚日就好勞氣喺facebook話，民主派議員嘅取態令人憂慮，又認為只有兩個情?下，民主派先應該考慮支持預算案，包括容許議員提出增加預算嘅修正案、政府答應落實全民退休保障。佢又反問，有「保皇派」支持已夠票通過預算案，泛民係咪應該為政敵「錦上添花」。
民主派召集人莫乃光話，有建制派議員都曾經用泛民對預算案?唔同立場去批評民主派，佢呼籲大家唔好中建制派計，因為民主派入面包容係好重要，大家有唔同取態反映有獨立思考。
莫乃光又認為，泛民將來可以再傾其他議案嘅投票立場，但佢個人認為唔應該有綑綁投票，因為大家嘅支持者都有唔同諗法。至於朱凱廸咁講會唔會分化泛民，莫乃光話「你唔將佢睇成係分化就唔會分化」，又強調喺一地兩檢、修改《議事規則》嘅立場上，大家都可以睇到民主派都一致反對，但喺民生、經濟嘅議題上大家取態唔同係正常。
;)
