【明報專訊】香港嘅電力供應相當可靠穩定，港燈行政總裁尹志田(CT)出席活動嗰陣透露，上年港燈供電可靠度刷新紀錄，有6個9，達到99.9999%，代表每個港燈客戶全年嘅停電時間只有半分鐘多啲。

港燈上年同理大、西安交通大學同國家電網有限公司成立咗「絲路工學院」，定期開辦工作坊培訓電力人才。噚日CT出席工作坊，分享咗自己七八十年代去「一帶一路」國家開荒嘅經驗。CT話，1970年代自己入行無耐，公司派佢駐沙特阿拉伯，參與多個能源基建項目，包括喺首都利雅德(Riyadh)建設全市嘅高壓電網。CT話，當時當地建設可以算係「一切由零開始」。由佢踏足當地開工，足足做咗一年零五個月，為當地電網基建打基礎。到咗今日，Riyadh已發展成沙特第一大城市同花園城市喇。