【明報專訊】雖然立法會最近兩星期氣氛緊張，但議員周末都可以享受家庭樂。上個周末，民建聯陳恒鑌(Ben)就趁秋涼時節帶埋個女去大嶼山，露營咗兩日一夜，忙裏偷閒之餘，仲順便教囡囡無論咩情况之下都要食餐好。 阿Ben話自己好享受露營，事前仲準備咗一隻塞咗香料嘅雞，去到營地整個「紙皮箱焗雞」，半個鐘就食得。佢同Emily講，做法好簡單，就係喺個紙皮箱內包層錫紙，再放啲燒到熱辣辣嘅石頭入去，個紙皮箱即刻變身焗爐；當日晚餐仲整咗一鍋臘腸鴨飯，留返啲飯焦做消夜，落埋蜆肉加啲水， 就變咗一鍋靚粥喇！Ben話好多香港人去露營都淨係煮個麵、食罐頭，但自己就比較鍾意煮嘢食，咁樣露營有啲風味。佢又話，自己親手用竹整咗假嘅弓箭畀個女玩。 佢話，個營地四處有好多垃圾，破壞環境，自己睇唔過眼，帶埋個女一齊幫手清理，身體力行，順便同個女上堂公民教育課，教囡囡要愛惜大自然，仲要做個有公德心嘅市民。
|
| |
| |
;){kind=small}
;)
