【明報專訊】過時過節，唔少政界人士都會落區，今年6月退出民協嘅民協前主席莫嘉嫻，前晚趁迎月夜喺九龍城馬頭圍、即係佢以前嘅選區，為街坊舉辦迎月晚會，又邀請幾個民協、民主黨同獨立區議員「跨黨派」出席，民主黨立法會議員黃碧雲亦有捧場，兩人仲齊齊喺facebook上載合照同活動相片。民主黨近期積極邀請莫嘉嫻入黨，莫嘉嫻噚日同Emily講，自己尚未正式入黨，唔會係今個月嘅事，但透露現時距離入黨已經「再近啲」。
相片所見，當晚晚會有唔少街坊捧場，有小朋友戴上兔耳道具跳舞表演。莫嘉嫻喺相片附註，講笑話「入黨啦入黨啦」、「傳媒又有新聞」。黃碧雲就讚晚會「小朋友表演可愛極了，長者街坊笑呵呵」，形容自己「和莫嘉嫻在一起」。莫嘉嫻話，晚會節目包括猜燈謎同表演，而黃碧雲就出席咗一陣。
;)
