【明報專訊】39個建制派議員前日寫咗封聯署信畀教育局長楊潤雄，表達對於大學校園出現「香港獨立」標語嘅關注，仲話期望各院校「果斷地取締所有違法港獨宣傳品」，要求教育局跟進。不過，Emily聽聞喺聯署名單入面嘅謝偉俊本身並唔想簽，而係負責搵人聯署嘅民建陳克勤解錯英文，誤會咗謝偉俊嘅回覆。

謝：意指無奈地唔想參與

謝偉俊同Emily講，雖然佢都反對港獨，但係佢覺得呢個時候最好等輿論自己評論，唔需要畀壓力政府，更加唔應該干預大學嘅管理，所以覺得個聯署「唔出好過出」，於是覆咗個信息畀陳克勤話「I'll pass」表達佢唔參加，但係可能溝通上有誤會，「相信佢以為pass意思等於通過咁解，英文上嘅誤會，佢當咗我同意，所以加埋我名落去」。

謝偉俊仲教下英文，話「I'll pass」通常就係比較無奈地唔想參與嘅意思，不過佢都好厚道，話唔會批評人：「咁算啦，無咩大問題嘅，不過呢個時候一人少一句會好啲啦。」Emily噚晚「try my best」打畀陳克勤，但係就無人聽電話！