【明報專訊】立法會調查特首梁振英同澳洲企業UGL所訂協議嘅專責委員會，噚日召開第二次會議，本身係律師嘅委員會主席謝偉俊(Paul)連番批評身兼大律師嘅新民黨立法會議員容海恩(Eunice)，話佢嘅發言，「不太合乎大律師應該有嘅最基本常識」。Eunice表明感到冒犯，阿Paul最終道歉。

謝道歉 「只係想幫你」

噚日會議係討論調查範圍應否包括協議係咪經過修改，Eunice一開始發言時認為委員會無權調查合約真偽，但阿Paul話，立法會調查範疇唔能夠單靠當事人提供嘅資料，又指Eunice本身係大律師，「我哋讓法律顧問向你提供一個好基本嘅法律常識」，引起一陣笑聲。

Eunice其後第二次發言時，即被阿Paul打斷，「我真係唔可以再畀你講說話，令你喺公眾眼中，不太合乎大律師應該有嘅最基本常識」，再次引起哄動。Eunice聞言後感不滿，直言覺得被冒犯。阿Paul解釋「我只係想幫你，如果有任何冒犯你，對唔住」。

浩鼎開口「護花」

同為律師嘅民建聯周浩鼎都發言護花，話「大家都係法律界行家，都明白嘅」，但認為阿Paul對Eunice嘅言論「有少少冒犯」、「唔太公道」。阿Paul即再道歉，又喺會議臨結束前，再主動話，「我再次向容海恩議員道歉，可能我說話太快……對唔住，我再次誠懇地道歉，無任何質疑你專業操守或資格嘅評論，可能電光火石間有啲不經意嘅傲慢出來，唔好意思」。