【明報專訊】《南華早報》噚日喺網上上載咗前投資推廣署長盧維思(Mike Rowse)嘅文章，評論香港女士冬天衣著，又提到部分女士著衫係為咗吸引街頭目光，點知惹嚟網上極大爭議，有網民大叫「嘔心」。最後《南早》將文章下架，總編輯仲發聲明致歉。盧維思同Emily講，只係一篇輕鬆小文，毋須過度反應，強調自己絕無貶低或物化女性之意。
呢篇具爭議嘅文章標題為《香港女性如何在寒冬中保持衣著出眾》。盧維思喺文中話，為女士喺寒冬仍著超短裙、短褲出街嘅勇氣而鼓掌，又話自己雖然對佢哋外表嘅欣賞，多過擔心佢哋會冷病，不過為咗夏天仍能見到大家，佢提醒要注意身體。
佢又品評話，最能吸引自己目光(light a spark in an old man's eye)嘅最佳冬日衣著，係低於膝下數寸嘅靴子、高於膝上嘅長外套，裏面再配上一條裙。
南早總編：該報非物化女性平台
文章上載之後隨即畀網民怒轟係侮辱女性，《南早》之後將文章下架。總編譚衛兒仲出聲明向讀者致歉，話刊登盧維思文章係嚴重判斷失誤，同該報編採價值相悖。佢話，該報歡迎不同觀點人士發表意見，但唔係宣揚物化女性嘅平台。
;)
