【明報專訊】公民黨「飛機師」譚文豪有一對兩歲半嘅龍鳳胎，梗係明白做父母嘅壓力啦，佢噚日參加親子旅行，用擔挑竹籮孭起一對小朋友，仲有感而發，話咪睇佢笑笑口呀，孭起一對仔女一啲都唔輕鬆。

譚文豪話，最近研究緊政府提出嘅《2030+》規劃研究諮詢文件，睇到人口數據感受特別深。佢話《2030+》以香港嘅住屋容量需容納900萬人嚟規劃，所以要發展東大嶼同新界東北，不過，佢話份報告好理直氣壯咁講「持單程證來港人士會繼續是人口增長的主要來源」。

飛機師就話，究竟政府未來係為乜嘢人嚟做規劃，質疑政府做咗幾多嘢去處理港人家庭生育問題。佢話真正鼓勵生育嘅稅務優惠、資助房屋、育兒津貼、侍產假等等，政府就懶懶閒、百般推搪。佢仲話，好多朋友都因為經濟及精神壓力太大唔敢生小朋友，所以佢未來會多關注生育政策問題，等大家可以安心孕育下一代。