【明報專訊】立法會主席梁君彥上場初期，議會內爭吵不斷，搞到梁主席都好頭痛，至近期議會突然變得好太平咁，會議仲好快開完。梁主席就話，𠵱家社會上政治雷達都係關心特首選舉，而佢或立法會唔喺雷達範圍內，希望政府換屆前議會都可以平靜啲。
近日支聯會副主席蔡耀昌取得回鄉證返內地，梁主席又會唔會帶全體立法會議員北上交流？佢就話呢啲事唔使急，又話特首選舉前難以成事，而之後又有回歸20周年活動，大家都會忙。不過，佢話議員想去內地交流唔一定要靠佢，各個委員會都可以各自提出要求，例如以委員會名義考察東江水都可以諗嘅。
立法會𠵱家靜番啲，但到咗出年3月之後又要審議財政預算案，可能又有議員拉布。對於剪布問題，梁君彥答得輕鬆，話前主席曾鈺成已做咗樣辦供參考，以前大概用咗100個小時審議，但當中20多個小時花喺點人數度。佢當然會參考前主席做法，仲話明唔會特別幫政府，會留足夠時間及程序畀議員辯論表態。
;)
