【明報專訊】民建聯今屆12張參選名單全數當選，噚日舉行茶敘總結選戰，不過Emily只見成功連任嘅一班「舊人」現身，新丁全部唔見影。民建聯蔣麗芸(Ann)就講笑話，個個都想約新丁，佢由9月4號等到噚日，都無人搵過自己做訪問，等到忍無可忍，所以先要約茶敘見吓大家咁話。

Ann姐話，新一屆立法會，自己想多做有關青年及教育工作，仲透露第一項動議會提出成立免費體育電視台。今屆立法會已有唔少年輕本土派入局，Ann姐話自己會同周浩鼎擔當溝通橋樑，負責代表民記同新晉議員率先交流。不過平日Ann姐喺議事廳不時同泛民火併，唔知未來又會擦出咩火花？Ann姐就話，呢班新人並非「老政棍」，覺得佢哋入議會係有理想要實踐，「不排除聯手推動惠民政策」。

隨着多個民記元老退位，得番進出口界黃定光(象哥)留任。佢喺茶敘上就話下屆自己「must be」退休，大呻本身培養咗周浩鼎呢個接班人，點知被民記徵召去選超區，搞到自己要捱多4年。眼見象哥發牢騷，在旁嘅Ann姐都要賣吓口乖，大讚象哥係「法案委員會之王」，話外人以為象哥喺議會瞓覺，實情象哥喺77個法案委員會中參加咗60幾個，希望大家對象哥評價可以正面啲。