【明報專訊】政務司長林鄭月娥今日就會宣布政改方案，聞說噚日行政會議已先睹為快討論方案，而今個禮拜六，3司12局官員仲會落區大宣傳。不過，咁啱喺呢啲重要時刻，特首梁振英(CY)出咗埠，噚日朝缺席行會去咗南沙出席中國(廣東)自由貿易試驗區掛牌儀式，周末仲會去馬來西亞出席東盟會議，政改宣傳都唔使佢做。 南沙公幹 缺席行會討論政改 有政界花生友好奇話，點解行會審議政改嘅日子，CY會走咗去，行會改由林鄭主持，話咁樣會令人以為「阿爺」唔使CY搞政改喎。不過，有政圈人士就搭嘴話，政改方案其實早已塵埃落定，CY喺唔喺度分別都唔大，認為唔使諗得太複雜。 講番CY，佢噚日晨早上咗南沙出席廣東自貿區掛牌儀式，事後發表網誌，話南沙鄰近香港，自貿園區嘅成立將為港商帶來更多商機。到咗周六(25日)下晝，CY會啟程去吉隆坡，出席第12屆東南亞國家聯盟領袖論壇，下周一(27日)下午返港。CY離港期間，又由林鄭署理行政長官職務。
|
| |
| |
;){kind=small}
;)
