【明報專訊】佔領中環商討日嘅投票結果前日塵埃落定，唔少落選者都睇得好開，至於係唔係阿Q，讀者可自行判斷。「18學者」之一方志恒話學者無動員都竟然有76票，大笑話已經「相當理想，係一個好結果」。反對佔中嘅「幫港出聲」發起人何濼生提出嘅方案，最終得到「神聖一票」，佢都話有啲驚喜，因為無諗過有票，仲話「多謝投票者」。

方志恒：無動員有76票 好滿意

方志恒噚日以電話接受港台同商台訪問時，話自己一直都以順其自然態度看待投票。所以今次學者方案，喺2565票中攞到76票，佢大笑話已經超額完成，相當滿意結果。

何濼生就同Emily講，當初無把握可以有票，因為投票嘅人都係佔中支持者，加上社會上無咩人對佢嘅「正負票方案」有深入理解，所以預咗捧蛋。𠵱家有一名佔中參加者投票畀佢，佢話相信投票者係有認真研究過自己嘅方案。

何：投票者有認真研究方案

自己方案落選唔緊要，但何濼生最失望嘅係，其他公民提名以外嘅方案前日都無法出線，質疑佔中6月22日仲搞全民投票無公信力，所以佢唔會參加。佔中發起人之一戴耀廷噚日講，市民如果唔滿意3個政改方案，6．22可投棄權票，但何濼生潑冷水話，戴耀廷咁講都未必可以提高投票率，估計參加全民投票嘅人唔多。