【明報專訊】政改諮詢明日結束，連日來唔少團體都搞吓論壇大談政改，香港電台英文台節目Backchat噚日亦有特別節目，請咗公民黨余若薇、全國政協委員胡漢清、全國人大代表王敏剛等人一齊討論。直播節目有幾十個現場觀眾，當中人稱「米老鼠」嘅前投資推廣署長盧維思就以觀眾身分發言，佢好關心香港政局，話覺得要取得提委會過半數支持先可以做特首候選人並唔合理。 認為公提違憲 公民推薦可考慮 米老鼠話，如果2017年特首選舉嘅提委會，要跟隨現時選委會組成，仲要取得過半數先可以成為候選人，根本唔係畀香港人真正選擇。不過，佢唔支持公民提名，認為係違反《基本法》，但公民推薦就可以考慮，但唔需要寫入法律。咁門檻應該係幾多？佢就話可以維持八分之一，或者取得提委會15%至20%支持都可以諗吓。 雖然主題係講政改，但節目上亦有外國人借題發揮，有個自稱係教師嘅外籍人，話因為自己無學位，所以教育局唔畀佢做老師，佢要求被視為2017特首熱門人選之一嘅余若薇表態，如果做咗特首，會唔會改革香港教育制度？又問對方囡囡喺外國讀書，係咪反映佢都唔信香港嘅教育？
|
| |
| |
