【明報專訊】台灣反服貿學生宣布聽日(星期四)退出立法院，總統馬英九暫時可以鬆一口氣，不過港大民研計劃最新兩岸政治人物民望調查發現，對比半年前，馬英九排名由第5位跌到第8位，係1999年來新低，跌8.7分，至51.7分。民研總監鍾庭耀分析，或者同佢處理近排學生運動有關。 兩岸政治人 朱鎔基第一位 國務院前總理朱鎔基退休多年，人氣未減，佢嘅評分雖跌咗3.2分，但仍以68.7分排第一；國家主席習近平升2.8分，以65分排第二。另一前總理溫家寶、前國家主席胡錦濤同台灣前總統李登輝，就齊齊跌一位，分別排第3、第4同第9。 今次調查分兩階段，首階段(3月24至27日)先問市民熟唔熟悉某啲政治人物，第二階段就喺3月28日至4月2日進行，兩次各訪問逾千人。評分最高抽樣誤差係正負2.4分。其他改變包括國民黨榮譽主席連戰取代前總理李鵬，令兩岸政治人物榜變成大陸對台灣「六四分帳」。
|
| |
| |
