【明報專訊】「強拆」事件喺立法會發生!立法會一眾議員司機,平時坐喺特設休息室等老闆時可能有啲悶,成班人夾咗幾千大洋,早幾日買咗張美式桌球枱放喺房內,諗住喺「等待歲月」中康樂一番,但唔夠幾日,波枱無聲無息畀人拆散晒,仲爛到砌唔番!班司機大佬梗係㷫啦,懷疑係立法會秘書處所為,諗住今日去搵秘書處理論,要求賠償。至於係唔係立會秘書處拆嘅呢?秘書處話要先了解事件,再作處理。
秘書處稱先了解 「休息室非打球用」
Emily向立法會秘書處問咗幾個問題﹕點解採取拆除行動,司機違反咩嘢規定?立法會依據咩例拆對方物品?事前有無警告同通知?如何善後同會否向司機致歉?秘書處回覆話,司機休息室係畀司機作休息用途,唔係用嚟打桌球。佢哋要先了解事件,再作處理。
話說嗰張波枱係20幾名議員司機一人夾200蚊買嘅,大概上周四、周五送到休息室,有司機話,當日即場裝嵌時,立法會保安都在場,並無即時制止或提出有問題。
每人夾200 稱保安沒阻裝嵌
誰不知張枱用咗無幾多日,一個周末假期後,司機周一就發現波枱被拆散,仲整爛咗。司機們好不滿,佢哋向Emily承認事前無向立法會申請,唔知道有無違規,但立法會無理由蝦佢哋,唔聲唔聲拆爛佢哋嘅物品,所以噚日班司機發起聯署信,仲搵到議員出頭,今日向秘書處投訴。