【明報專訊】距離下屆2016年立法會選舉仲有兩年多，功能組別議席暗湧乍現，幾個工商界代表議席或會出現換血。除咗做咗兩屆工業界(二)廠商會代表林大輝盛傳會轉戰直選，當中已連續做咗3屆議員嘅經民聯林健鋒同梁君彥嘅議席或有暗湧。 總商會代表林健鋒同工總代表梁君彥前年爭取連任時已有暗湧，有傳自由黨有意派人挑戰議員寶座，不過最後未有成事，而兩人順利自動當選。 已做3屆 傳將被挑戰 不過，到2016選舉呢支歌仔就未必會再唱得響，事關二人由2004年開始做議員，至今3屆，而近日開始傳出有機會出選嘅人名，例如上年加入經民聯嘅工業總會副主席、深水埗區議會主席郭振華就係其中一個。另外，總商會即將換屆，有傳自由黨正醞釀收復失地，最後總商會立法會議席鹿死誰手，拭目以待。 不過，講到尾，功能組別都只係得24萬選民有得投票，以總商會同工總兩個議席上年仲係自動當選，票都唔使投，呢啲選情暗湧可能都只係小圈子先感受到。
|
| |
| |
