【明報專訊】申訴專員黎年任期3月31日屆滿，噚日係佢任內最後一次發表調查報告，並且發表感言，話任內見證政府官員有進步，面對投訴時無以往咁「自我保護」。佢仲講笑咁話，自己無特別嘅心得傳畀下任專員劉燕卿，但有一班熱心同事會幫佢。

上任5年嘅黎年，噚日喺發布會尾聲時，回應傳媒問佢嘅離任感想，佢話好多謝傳媒支持，每次都廣泛報道申訴專員公署嘅報告，變相幫公署宣傳，令市民更了解公署工作。佢仲笑言每次發布會後投訴數字都上升，令同事工作量增，好唔方便喎。

黎年希望政府管理層能夠明白時代轉變，昔日行得通，市民今日未必接受，應定期檢討工作，遇到投訴亦不應自我保護，應敢於接受批評，同埋聆聽投訴人嘅意見。不過，佢讚政府官員喺佢任內有進步，愈來愈開明。

有別於黎年，劉燕卿唔係政務官出身，黎年話自己喺政府工作多年經驗的確幫到做專員呢樣，但相信劉燕卿經驗豐富，可帶其他經驗入公署，又寄語佢要依法辦事。

出任公職40幾年，黎年話好幸運亦好感恩，因為做過好多唔同職位，獲得豐富經驗，包括廉署等。Emily祝佢一路順風，希望未有定向嘅佢，未來能繼續服務市民。