【明報專訊】近日網上瘋傳一啲餐牌，雖然呢啲餐牌唔知係真定係改圖，但有一個特點，就係餐牌上嘅ABC餐，有得揀等如冇得揀，好似噚日網上瘋傳嘅一張茶餐廳餐牌(圖)，3個選擇分別係「粟米牛脷」、「咖喱牛脷」同「洋葱燴牛脷」，食嚟食去都係牛脷。

網民上載呢啲餐牌圖片，係想講一個信息，就係若果特首普選有篩選，就會好似呢啲餐牌咁﹕你最多可以揀唔同嘅醬汁，但食嘅只得牛脷，本質無分別。呢張圖片喺facebook有成過千個likes，咁有共鳴，事關近期中央官員同建制派人士態度強硬，行會成員羅范椒芬日前喺北京話，提名委員會設關卡，就係要防止對抗中央人士成為候選人，以免出現熱門爆冷落馬，令對抗中央人士當選。