【明報專訊】前政務司長陳方安生噚日去浸大一個講座，同近百大學生大談「政改×青春」，大讚年輕人比佢後生嘅時候關心政治，當年後生嘅佢都比唔上佢哋，好似學民思潮嘅組織能力同運用facebook等社交網絡嘅能力簡直「一流」，不過原來陳太自己無玩facebook，原因係「我自己本人唔係太支持facebook」。

讚學民運用fb一流

台下唔少學生聽到陳太嘅霸氣回應都呆咗一下，不過陳太就淡淡然解釋，若用facebook溝通，好多嘢都唔可以直接控制，仲話自己去到呢個年齡，都唔覺得有需要學用facebook咯，所以都係用番傳統、控制到嘅途徑同人「有商有量」。陳太話，感受到港府官員都有啲誠意搞好政改，但問題在於中央係咪信任港人，而佢亦好同情政務司長林鄭月娥嘅尷尬位置，一方面清楚市民訴求，另一方面就好難說服京官接受市民要求。

噚日台下唔少同學都問陳太會唔會參與佔中，不過陳太就話，政府未出方案，所以不作表態。