【明報專訊】渣打馬拉松分開唔同組別嘅比賽，全長兩公里嘅「領袖盃」，噚日人才濟濟，由灣仔運動場跑到維園。呢排忙住處理活雞問題嘅食物及衛生局長高永文都有跑，最大目標係「跑得完，全程都要跑，好慢都唔緊要」，最終同醫管局行政總裁梁栢賢兩個男人手拖手衝線，好溫馨呀。

高局長話平日少跑步，過去一個月畀心機練跑3至4次。佢笑笑口同Emily講，𠵱家年紀大，好少玩球類活動，平時鍾意行路當做運動，例如間中會去米埔觀鳥。

負傷徐立之 鏡頭前幫手跑

另一跑手港大校長徐立之跑完之後汗流浹背，Emily仲以為佢拚盡狂奔，原來佢「傷膝」，只能步行，但補充話有主辦單位人士叫佢「喺鏡頭前跑兩步當宣傳吓」，於是佢都喺鏡頭前輕輕跑吓幫忙。徐校長話如果下年喺香港，會考慮參加10公里賽𠻹！領袖盃有超過40名商界及社會領袖出戰，結果由Crown Worldwide Holdings嘅Jennifer Harvey以6分57秒贏得冠軍。

新聞處未覆CY去邊

特首梁振英(CY)噚日打破傳統無主持渣打馬拉松，CY之前就解釋日程安排要平衡其他工作需要，仲話自己2月放咗10日假，搞到2月工作天「特別少」。Emily噚日問過新聞處，CY究竟去咗邊同做啲咩，但新聞處至截稿前無回覆。

阿基照玩自拍

CY唔到，但噚日唔少政界人士都現身支持渣馬，好似民協馮檢基、新同盟范國威都有落場跑，阿基就無視大會呼籲，繼續沿途自拍，仲將相片上傳社交網站。阿基仲話自己較上年用多10分鐘，Emily估計，如果佢唔自拍，可能會快少少到終點。好似一般採取「含蓄」態度支持業界嘅體育、演藝、文化及出版界嘅馬逢國，噚日都落場跑，不過就唔多覺佢有戴住支持新聞自由嘅藍絲帶。