【明報專訊】海洋公園噚日一年一度春茗，一邊廂宣布有21隻得意企鵝出世，另一邊廂，就快36歲嘅大熊貓佳佳「婆婆」，已經係全球圈養環境下最老嘅大熊貓！海洋公園陸生動物部高級館長祝效忠(Howard)同Emily講，佳佳唔止有高血壓同關節炎，近年仲發現有白內障，左眼視力幾乎無晒，只能靠右眼睇嘢。為咗令佳佳晚年有啲樂趣，護理人員特別準備咗「有味麻包袋」畀佢玩，巧妙地喺袋上添加薰衣草、檸檬等唔同味道，佳佳次次都玩得好開心㗎。 有白內障 年老難施手術 Emily估唔到大熊貓同香港人一樣，都面對老化同周身病痛，除咗榮升「婆婆級」嘅佳佳，Howard話，27歲嘅安安同樣有高血壓，兩隻大熊貓每日都要食高血壓藥；另外，隨住大熊貓愈來愈老，未必食到太硬嘅竹，所以要為佢哋預備軟啲嘅竹筍做食糧。Howard又解釋，因為佳佳年紀太大，做切除白內障手術要麻醉，風險實在太大，所以護理員情願用嗅覺同觸覺刺激佢，等佢玩得開心啲啦。
|
| |
| |
;){kind=small}
