【明報專訊】廠商會年底換屆,早前傳出有兩大下屆會長熱門人選,分別係副會長顏吳餘英同第二副會長李秀恒(Eddy)。李秀恒被人視為「梁粉」,有消息話,雖然顏太喺廠商會內呼聲較高,但至今佢只係「開咗聲」,仍未有實際行動,相反一向低調嘅Eddy,舊年年中已開始約會董食飯,睇嚟顏太要落下力啦。
點解對會長一職咁有興趣?廠商會消息話,廠商會有規定,副會長做夠3屆就唔可以再做,Eddy同顏太今年若果唔選會長,就連副會長都無得做。顏太做玩具生意、有幾幢商業樓揸手,Eddy就有工廠,如果計實力,似乎顏太看高一線咁講。
不過,另有消息就聲稱,Eddy雖然頻頻出動約人食飯,但係有會董覺得,佢用「香港經貿商會會長」個名喺報章發表文章,而唔用廠商會個名唔多好。睇嚟會長呢個位,仍有一番惡鬥。