【明報專訊】澳門噚日發表《施政報告》，向每名澳門居民派發9000蚊，相信馬交居民都好開心，因為派錢金額一次比一次多，相信港人都幾羨慕，網上唔少人就笑言想移民澳門！ 譚耀宗：人哋有錢嘛 不過，香港各政黨都幾反對政府全民派錢，對於今次澳門又派錢，議員都唔願意多評論，好似民建聯主席譚耀宗就話人哋有錢嘛；公民黨黨魁梁家傑只係話大家都無得收錢，無乜好評論。工聯會黃國健就指財爺曾俊華都講明唔會派錢，工聯會唔會反對政府派錢，但亦唔會主動要求。 據聞經民聯石禮謙有澳門身分證，如果係真嘅話，即係今次派錢佢都有份，噚日Emily話佢知澳門派錢消息，佢就笑住咁話「嘩！咁好？」但佢三緘其口，以香港議員唔回應澳門事為由，唔肯講自己有無得收錢，但梁家傑同梁繼昌一聽到，就即刻講笑話要求石禮謙請食飯。 民建聯何俊賢話，佢太爺嗰代嘅祖墳都喺澳門，但阿爸、阿爺都無拎澳門身分證，派錢當然無佢份。問佢係咪做澳門人好過香港人，何俊賢就話，「都係想做中國人！」
|
| |
| |
