【明報專訊】六合彩每期攪出6個號碼同1個特別號碼，無論電視台定係報紙，刊登號碼時都好小心，事關報錯一個號碼分分鐘令人誤以為中獎，又會有人誤以為無中獎。不過亞視就報錯咗號碼，噚日被通訊事務管理局發出勸喻警告。 事緣今年6月20日晚嗰期六合彩攪珠，結果應為11、14、16、29、31、46，特別號碼30，但亞視播出嘅畫面就錯誤顯示咗11、14、29、30、31、46，即係16唔見咗，特別號碼30則錯誤加咗喺正式號碼內。 因機器電腦系統故障 有心水清市民隨即向通訊局投訴，馬會亦發表聲明，指事故係亞視操作故障，對方已承諾調查。通訊局事後調查，確認錯誤係由機器及電腦系統故障造成，亞視後來亦致歉，因此通訊局決定向亞視發出勸喻，促請亞視嚴格遵守電視節目守則。
|
| |
| |
