【明報專訊】被喻為地球史上最大型陸上動物嘅恐龍，未來5個月大家可以去尖東深入了解喇。康文署喺香港科學館舉辦嘅「巨龍傳奇」展覽，今日起至明年4月9日展出，係香港歷來最大規模嘅恐龍展，除咗有真品恐龍化石，場內仲有11隻機械恐龍「活現」，市民只要攞住一個裝有磁石嘅「司令棒」，喺龍頭同雙爪等部位揮動，機械龍就會互動做出張牙舞爪嘅反應，另外仲可以撳掣，令機械暴龍發出「吼吼聲」巨響，十分過癮。 任摸禽龍類股骨化石 191項展品中，91件仲係珍貴恐龍化石、頭骨椎骨同恐龍蛋等真標本，放喺大堂嘅禽龍類股骨化石仲可以畀入場者任摸，另外仲有40多款原大嘅恐龍骨架模型，其中巨型祿豐龍等4隻恐龍骨架，就含有真化石標本。 政務司長林鄭月娥噚日為展覽開幕，林鄭話原來佢兩個仔細個時都好鍾意恐龍，可以如數家珍咁講出各類恐龍名字。 有興趣嘅朋友可以到尖東科學館道2號科學館一開眼界，成人票價20元，學生、殘疾人士及長者10元，記住逢周四休館。 仲有呀，Emily知道副刊嘅手足做咗兩大版恐龍展專頁，請來專家導賞，刊於D2、D3，即刻揭去睇吓啦！
|
| |
| |
;){kind=small}
