【Emily】邵家輝提控煙損經濟 盧寵茂：舊瓶舊酒 衛生委會鬥嘴 叫有具體方案再畀意見
[2024.10.19] 發表
【明報專訊】政府早前提出10項控煙建議，包括全面禁電子煙、加熱煙同加味煙等，批發及零售界議員邵家輝噚日喺立法會衛生事務委員會會議上，重申立場話控煙措施會損害旅遊經濟，舉例如果禁加味煙，亞洲等外國旅客都唔會再嚟香港。醫衛局長盧寵茂就形容邵家輝講嘅嘢係「舊瓶舊酒」，話「控煙十招」已有充分討論，政府都聽到各方意見。
邵家輝會上先感謝醫衛局支持減烈酒稅，但話有內地同日本朋友因為港府禁加熱煙同電子煙入口而唔嚟旅遊，如果全面禁，相信會進一步流失旅客，「如果你認為香港可以承受到呢啲遊客唔過嚟，我都冇辦法可以講」。佢仲話盧寵茂係「民望最高嘅局長」，但都要考慮其他民望低嘅部門，亦要整體諗下搞經濟。
盧寵茂回應時先話「呢個係一個衛生事務委員會嚟」，而「控煙十招」6月已經提出，政府亦聽到各方聲音，話邵家輝提出嘅所有嘢「其實係新瓶舊酒，甚至話係舊瓶舊酒添」。盧局長又話今年底至明年初會就控煙提交具體方案，議員可以睇到方案再畀意見，「最終決定呢十招係咪全部出晒嚟」。
邵家輝回應話，正如改革係唔停止嘅，佢作為議員都唔會停止表達意見，「意見係新瓶舊酒好，甚至係舊瓶舊酒都好，香港唔係得健康，都要平衡香港經濟」。而下一位發言嘅議員陳家珮就話想提一提自己嘅「舊瓶舊酒」，希望政府諗多啲解決出生率低、人口老化問題嘅辦法。
更多港聞
【明報專訊】噚日其中一場《施政報告》措施記者會由政務司副司長卓永興、文體旅局長楊潤雄同商經局長丘應樺主持。最後一條問題由港大學生記者發問，問...
詳情
【Emily】灣仔海濱水幕匯演 林世雄：展現創新
【明報專訊】一連兩日嘅「灣仔水幕光影之旅——特色匯演暨嘉年華」噚日喺灣仔海濱公園舉行，作為國慶75周年嘅慶祝活動之一，今次活動主打大型海上水... 詳情相關新聞
