【Emily】陳朗昇不角逐連任記協主席 稱「無奈要下船」 盼有志同業挺身而出
[2024.05.15] 發表
【明報專訊】香港記者協會下個月底舉行會員大會，改選新一屆執委會，擔任咗3屆主席嘅陳朗昇原本打算爭取連任，但噚日佢喺社交平台宣布，唔會再角逐連任主席。佢解釋，有呢個決定係聽取唔同意見同分析後，認為續任主席會「非常艱難」，「看來不是對記協最佳的選擇」，又提到「陳朗昇」加上「記協」所帶來嘅攻擊、注視，睇嚟遠比兩者分開為多。
根據記協會章，主席最多可做4屆，陳朗昇話原定會爭取連任多一屆，但最終決定唔再角逐連任。佢形容呢個決定係「無奈地要下船」，亦好難好似前輩咁為記協準備一個未來掌舵人。最後佢寄語同業，香港需要新聞自由同專業，而記協為呢個目標奮鬥咗超過半世紀，希望有志嘅同業認清時局後可以挺身而出。
陳朗昇提到，記協喺2021年12月29日後備受壓力，時任執委會每日評估形勢、方向，分分秒秒為記協前途作唔同思考、決定；嚟到今日，記協繼續喺風眼之中，「雖獨力難支，但可幸是還有熱心同業繼續服務於執委會，令我們在滔天巨浪中，縱然顛簸，仍能緩進」。
翻查資料，警方國安處喺2021年12月29日拘捕「立場新聞」7名員工，時任「立場」副採訪主任嘅陳朗昇亦被帶走協助調查。
更多港聞
【Emily】私隱署推「關注私隱週」 展覽車有片睇有遊戲玩
【明報專訊】個人資料私隱專員公署上星期五（10日）起推出「關注私隱週2024」，以數據安全做主題，舉辦連串推廣同教育活動，加強機構同市民保障... 詳情
相關新聞
