【Emily】梁家傑:當年選特首 有人拍晒枱 話同延任一樣 政治判斷無對錯
【明報專訊】公民黨主席梁家傑噚日出席港大學生搞嘅論壇討論民主派立法會議員去留問題。傑哥重提自己喺2007年參選特首,透露當時「有好多民主派大佬、大姐拍晒枱」叫佢唔好去選,話呢個係原則問題,指參選等於認同北京欽點特首嘅制度;傑哥認為,嗰次同現時議員延任爭議一樣屬政治判斷問題,冇話邊個啱邊個錯。
回顧選特首,傑哥話喺改變政治生態上,自己都起到「一丁點兒」作用,起碼𠵱家「中共要欽點邊個做特首,你(參選人)唔可以唔做電視辯論,假假哋都要做一兩次畀人睇啦」。
毛姨話10萬蚊濕濕碎 嚇親傑哥
至於延任爭議,立法會議員毛孟靜(Ms Mo)亦有出席論壇,對於有人話泛民議員為咗大約10萬蚊人工先留任,佢唔認同,仲對住傑哥話「對於呢啲資深大狀嚟講,(10萬)係打個乞嚏」,嚇到傑哥喺隔籬回應「我唔係呀」,引來哄堂大笑。
曾擔任新聞主播嘅Ms Mo話自己唔係戀權嘅人,如果當初「留喺大台新聞部,今日點都做到新聞總監啦」。點知傑哥唔多同意,「我唔係懷疑你嘅能力,(你)能力勁過花哥(無綫電視助理總經理袁志偉)𠻹啦」,但話𠵱家做新聞總監要講「政治正確」,覺得Ms Mo冇咩機會喇。