【明報專訊】立法會選舉料9月舉行，噚日政制事務委員會討論選舉指引，新民黨主席葉劉淑儀火力十足，鬧政府「縮骨、卸膊」。話說立法會選舉指引正諮詢，包括建議70歲以上長者、孕婦同殘疾者可優先排隊，葉太質疑迪士尼等地方如果人多都自然有靈活安排，「你哋好醒目㗎嘛，公務員聲譽高，乜都問市民？呢啲你要作主意吖嘛，我聽到好反感呀，你哋縮骨、卸膊囉」，強調立法會選舉要靈活安排，唔明點解咁都要問市民意見。 政制及內地事務局副局長陳帥夫就話，就立法會選舉安排，選管會每次都會安排公眾諮詢，葉太就質疑「僵化啲喎，排隊安排唔係要修例，咁簡單都要出報告諮詢？唔需要咁呀？」 現時選舉投票領選票時，票站人員會劃去投票冊上嘅選民名稱資料，葉太表示區選有56宗冒充投票投訴，建議大量採購辨認指紋機器，「一度(指紋)就知係咪陳帥夫(投票)，咁都做唔到？要幾多錢呀？」陳帥夫解釋咁做要修例，葉太隨即質疑，「叫你唔好劃線，用手指模，都要改法例？法例講要劃間尺？」陳帥夫就答呢個前高官，話法例的確係咁寫，所以要修例；葉太聽完就悻悻然拋低句，「唔好嘥時間啦，畀第二個問啦」。
|
| |
| |
;)
