【明報專訊】反修例風波以來，警方積極利用facebook專頁發放資訊甚至做直播，警方噚日喺facebook出帖，話開專頁4年來，累積like數已有30萬，「多謝大家支持和鼓勵」，又話希望大家透過轉載分享警察信息，令知道真確資訊嘅人遠超30萬，「達至『300萬，thx！』甚至『3000萬，thx！』」。不過，警方出post後隨即有網民呼籲大家「unlike」，令讚好人數短時間急劇下跌，約5個鐘後已跌穿29萬。 追蹤人數逾40萬 網民：反映食花生 同時，警方專頁嘅「追蹤(follow)」人數有逾40萬，相信玩開facebook嘅人都應該知道「追蹤」同「like」嘅分別。有網民就話，數據反映出大家只不過係想「食花生」，而並非真係支持警隊，認為警方表現「小學雞」。 截至晚上8點，警方facebook讚好人數已跌穿28.7萬 ，追蹤人數有約40萬；至11點跌至28.5萬。 新型冠狀病毒疫情持續，本港早前出現「口罩荒」，市民見網上有代購就紛紛留言「2盒，thx」，令呢句成為流行用語；上月20日有警員確診感染後，有網民話「3萬(指警隊人數)，thx」，可見警民關係自反修例風波以來一直僵持。
|
| |
| |
;){kind=small}
;)
