【明報專訊】特首選舉「跑馬仔」逐步升溫，沙田馬場噚日亦有鄉議局盃賽事「跑馬仔」。除咗鄉議局主席劉業強，好多身兼選委嘅鄉事都有現身，包括上水鄉委會主席侯志強、沙田鄉委會主席莫錦貴同十八鄉鄉委會主席梁福元等，鄉議局邀請咗4個特首參選人去廂房睇賽馬同享用午宴，但只有葉劉淑儀應邀出席。 邀4人到馬場 僅葉太出席 問到係咪嚟午宴拉票，葉太強調自己係應邀出席。葉太噚日仲同囡囡葉榮欣(Cynthia)一齊現身，佢哋有落沙圈觀馬，葉太無買馬，而Cynthia落注200元，結果一擊即中贏得310蚊。 劉業強喺午宴致辭，話除咗噚日場馬，3月26日亦有一場好大嘅賽事(意指特首選舉投票日)，佢形容呢場賽事好激烈，自己希望落場跑嘅要「識跑沙田」，「因為我哋係新界人」，仲話如果唔識跑沙田，鄉議局就唔會支持佢咁話。葉太喺台下聽到都笑咗出嚟。 重申鄉議局傾向提名一人 劉業強話，有人鍾意買熱門，有人會「收風」落注，自己身為選委會聽鄉民意願。至於侯志強早前話綑綁提名都可以分「幾紮」提名唔同人，劉業強就向Emily重申，鄉議局目前都係傾向「一紮」，即係綑綁提名一個參選人嘅。
|
| |
| |
;){kind=small}
;)
