【明報專訊】唔少人都知青年民建聯主席顏汶羽(Frankie)嘅師父係立法會前議員陳鑑林，但佢加入民建聯之前，原來已經係匯賢智庫成員，佢話自己係匯賢智庫第一批會員，仲記得會員編號係41號𠻹！Frankie話佢當年仲喺九龍東，同創辦匯賢嘅葉劉淑儀一齊搞選民登記活動，喺坪石邨茶餐廳飲過奶茶㗎。

自爆一度被拒民建聯實習

Frankie話大約2006、07年時，仲讀緊書嘅佢主動敲門加入匯賢智庫，同葉太一齊去做選民登記，當時葉太畀佢嘅印象的確幾嚴肅，至於後來點解選擇加入民建聯，佢就話匯賢智庫唔係政黨，無參與選舉喎。雖然Frankie係青民主席，但佢自爆當年申請參加青民搞嘅民建聯實習計劃被拒，其後再向陳鑑林辦事處應徵，對方就請咗佢。

民建聯會分別同4名特首參選人見面，上周六已見林鄭月娥，今日就會見葉太。Frankie相信各人政綱唔會有好大分別，佢期望下屆政府多啲同市民互動，特別係網上工作要做好，指現屆政府都有開設「上亞厘畢道」嘅facebook專頁，同網民就政策交流等；又話副局長、政治助理應落區派吓單張，同市民交流，直接聽意見。