【Emily】官員接連染疫 新增私隱專員消防處長
[2022.08.05] 發表
【明報專訊】香港新冠陽性個案噚日破5000宗，個人資料私隱專員鍾麗玲、消防處長楊恩健都先後核酸檢測同快測陽性，正按衛生防護中心命令隔離，鍾麗玲最近一次上班係7月29日，楊恩健係噚日，佢哋最近冇外遊紀錄。楊恩健係因同層工作嘅同事確診而做驗核酸發現中招，消防處兩個副處長黃鎮業同陳慶勇亦喺噚日驗核酸，結果係陰性。
噚日亦有兩宗同政策局相關嘅確診個案，財庫局噚日公布，局長政治助理葉俊廉初步確診，佢最後上班係周二(2日)；局長許正宇、副局長陳浩濂每日有做快測，結果都係陰性。
另外，環境及生態局長謝展寰嘅政務助理李泳嘉亦中招，局方話佢日常主要喺辦公室工作。謝展寰每日做快測，結果係陰性。
更多港聞
相關新聞
