【Emily】網上交流會 選委輪流讚揚 李家超未選先做「特首」
[2022.04.13] 發表
【明報專訊】已宣布參選嘅前政務司長李家超噚日連續舉行兩場網上交流會，同約百名選委交流，其間有62名選委提問或發表意見，好多選委趁機提出業界嘅問題，及對新一屆政府嘅期望，Emily聽咗一段時間後，突然被金融服務界選委李耀新嚇親，只見佢低頭時，後面多咗個人笑笑口望住鏡頭，睇真啲，原來係其Zoom背景有佢張相。
李耀新Zoom出現「兩個自己」
絕大部分選委都表明支持並大讚李家超，出入口界選委張明敏仲先後稱呼李做「特首」、「未來特首」𠻹！張明敏建議，新一屆政府應要畀香港年輕人參軍，仲要大力提倡普通話，由特首及立法會議員開始，用普通話發言，仲希望建立中國共產黨黨史館，認識自己嘅領導人。
李靜讚李「文武雙修猛人」
喺東京奧運成為「金句王」嘅乒乓女隊主教練李靜係體演文出界選委，佢大讚李家超係「文武雙修嘅猛人」，相信新一屆政府可帶領香港搵到合適發展步伐，最後佢再有金句，「香港事喺心上，心喺香港事上，香港如此多嬌，還看家超」。李家超同身旁兩名競選辦副主任譚志源同黃英豪都忍唔住笑。
更多港聞
【Emily】指「勁揪體」被抄 創作人：華園零食允回收產品
【明報專訊】字體「勁揪體」創作人文啟傑（Kit Man）前日喺facebook發帖，話之前喺阿布泰國生活百貨見到，華園零食嘅包裝懷疑用咗佢「... 詳情
【明報專訊】特首林鄭月娥本月4日喺朝早嘅抗疫記者會宣布唔尋求連任，將會結束佢長達42年嘅政府服務生涯。香港民意研究所喺4月4至7日，由真實訪...
詳情
【明報專訊】4月10日係新一屆立法會議員上任100日，自稱非建制派嘅社福界議員狄志遠噚日發表工作報告，記得佢當選前後都話過，上任100日內會...
詳情
相關新聞
