【Emily】做過互聯網公司GM 唔做議員 莫乃光被獵頭做AM
【明報專訊】莫乃光(Charles)早前宣布唔會競逐連任立法會資訊科技界議員,噚日佢喺facebook上載一封獵頭公司畀佢嘅信,笑言「咁快就知我要搵工?」該信開頭好親切咁問候「Charles最近好嗎?」,內容係該公司正為其客戶搵有經驗嘅銷售員,話搵「AM or SM」(即助理經理或高級經理),客戶係一間軟件公司。仲叫佢如果有SOA-QPS經驗,即政府「優質資訊科技專業服務常備承辦協議」嘅服務經驗,就寄履歷畀佢哋。
獵頭公司話係自動寄畀所有人
做咗8年議員嘅Charles,之前曾任互聯網公司嘅總經理。佢份履歷咁亮麗,該職位可以話係大材小用喇。不過,Charles同Emily講,十幾年前都有幫公司競投過呢類政府外判合約,但過咗十幾年,世界變得咁快,笑言「擔心自己唔勝任」。
Charles話獵頭公司聲稱係自動send招聘廣告畀LinkedIn所有人,「真想話佢知今時今日咁嘅態度唔得架喇」。佢同Emily講其實係講吓笑,唔會咁教訓人,但話用得LinkedIn一般都係睇吓對方條件啱唔啱,然後先send信畀人,唔會咁樣亂send。