【Emily】警IG帖文 藍是「真相」黃是「假新聞」
[2020.04.24] 發表
【明報專訊】警察近年重視經營社交媒體，但有時表達方式都會令人搲爆頭。話說警隊噚日喺官方Instagram帳號上載一張圖，圖內有一個疑似腦部嘅迷宮，起點係綠色嘅「事實」，一邊一條藍色嘅路通向「真相」，較為直接；另一條黃色嘅路就通向「假新聞」，相當迂迴。圖中強調「真相謊言只在一念之間」。
網民質疑想講藍絲「諗埋一邊」
警方喺圖片說明話「真相愈辯愈明，你我可做決定」，叫大家向假新聞說不、分享之前要諗諗。呢個表達方式就令網民反問「幅圖想講乜？」有人質疑張圖分藍黃係暗示黃絲經大腦消化就係假新聞、藍絲「諗埋一邊」就叫真相。有網民就二創「7月21日遲到或準時，一念之間」，諷刺7．21元朗白衣人打市民事件，警隊遲到39分鐘一事。
Emily問過民主派會議召集人陳淑莊，佢睇咗一陣之後話都有啲不明所以，「真係『問米』先知(意思)」，又質疑其實假新聞應該好直接，點會用個腦諗咁耐？
警隊其後又出post，話新界北總區指揮官、屯門警區管理團隊前日(22日)以視像會議，同區內學校代表分享點樣提供安全學習環境；又話年輕人守法意識下降，主因係接收咗唔準確嘅信息同缺乏有效溝通。
更多港聞
【明報專訊】2017年4月起出任香港教育大學校董會主席嘅馬時亨，年尾就告別喇。政府噚日宣布，再度委任馬時亨做教大校董會主席，由聽日直至今年1...
詳情
【明報專訊】立法會噚日繼續二讀辯論《撥款條例草案》，議員朱凱廸批評政府削港台資源，話港台嘅節目網上點擊有幾千萬，點解仲要削營運開支。何君堯就...
詳情
相關新聞
