【明報專訊】今年嘅農曆新年遇上武漢肺炎，唔少新春團拜、活動都要取消。中聯辦亦喺網站發出公告，話因應新型冠狀病毒肺炎疫情防控工作要求，經研究後決定，取消中聯辦港島、九龍及新界工作部2月初舉辦嘅新春酒會，表示不便之處敬請諒解之餘，仲請大家互相轉告。

新界鄉議局噚日亦宣布，因應疫情最新發展，取消聽日上午舉辦嘅新春團拜，及周日(2月2日)喺沙田馬場舉辦嘅鄉議局盃活動，祝大家新春大吉、身體健康。另一邊廂，過往民主派喺新年都會同傳媒團拜，大家傾吓偈慶祝新年，公民黨噚日以武漢肺炎疫情嚴峻為由，決定取消2月4日舉行嘅傳媒新春團拜。呢個新年，Emily相信大家聽得最多嘅祝賀說話，都係「身體健康」喇。