【明報專訊】立法會財委會仍然未可以表決公務員加薪撥款申請，要過咗農曆新年、今個月31號先再開會，一眾公務員無得過肥年。財委會主席陳健波噚日開會都好勞氣，當工聯會黃國健同民主派議員對罵時，波哥呼籲建制派要忍，話已經進入審議直路，「為咗幾十萬公務員福祉，大家要忍住」，又話自己都忍咗好耐。 提出劃線停止發言 泛民不滿 話就話進入審議直路，但似乎未見盡頭。波哥喺會上話自己嘅初心係希望可以喺農曆新年前通過加薪，呼籲民主派都拎番從政初心服務市民。佢又話撥款申請已審議咗20小時，議員發言重複又離題，因此提出「劃線」停止議員發言，但此舉引嚟民主派議員不滿，話有唔少議員未提問，雙方又再爭拗一番。 民主黨許智峯喺會上批評公務員事務局長羅智光係「狗官」，話羅愧對香港人，因為早前中西區區議會上，民政事務專員同警務處長鄧炳強拉隊走人，反映公務員上樑不正下樑歪。羅提出抗議，許智峯收回「狗官」嘅形容，並提出中止議案。 噚晚會議結束都未辯論完中止議案，下次開會要先處理中止議案，先可以再審議加薪撥款申請。
|
| |
| |
