【明報專訊】2020年將至，政府聽日元旦起會將公共交通費用補貼計劃(交通補貼)加碼，補貼比率由400元以上交通費補貼四分之一，提高至補貼三分之一，每月補貼上限由300元提高到400元。除咗補貼金額加咗，以後領取補貼亦會更方便。現時市民要領取交通津貼，通常都要去港鐵站或者便利店等拍卡；八達通噚日宣布，已經提升八達通App嘅功能，iPhone用戶第日可以喺手機拍八達通卡，就能拎到交通津貼，呢個App亦可為八達通增值、或進行買巴士月票等交易。

新方法要使用iPhone 7或之後型號，以及iOS 13或以上版本，而且只適用於9位數字嘅八達通卡，即係前面8個數字加括號內1個數字，如果係比較舊嘅八達通卡，就要用番之前嘅方法領取。Emily噚日都更新咗八達通App試過，只要喺App入面輸入八達通號碼，再將八達通卡拍向手機背面，就可以拎到未領取嘅交通津貼，所需時間同平時用八達通買嘢拍卡差唔多。