【明報專訊】熱血公民立法會議員鄭松泰喺7月提出立法會口頭質詢,要求政府回應《逃犯條例》修訂草案對香港造成嘅經濟影響及對社會嘅傷害,立法會大會噚日原本應處理泰博呢條口頭質詢,但同日保安局長李家超提出撤回條例修訂嘅動議,加上泰博不滿政府嘅回覆係將亂局歸咎示威者,所以決定撤回口頭質詢。不過,由於建制派議員反對泰博撤回,結果反而由民建聯主席李慧琼(Starry)接手質詢,仲可以順便問政府。
泰博早前提出改質詢題目不獲批,噚日又遇到建制議員反對而無法撤回口頭質詢,最終佢離開咗議事廳,主席梁君彥就指示在席最資深議員、即係Starry代為讀出質詢內容。商務及經濟發展局長邱騰華話,過去4個月香港經歷多場示威、遊行同集會,當中有唔少演變成暴力事件,亦有激進示威行為包括堵塞機場、破壞港鐵設施,同街頭暴力等,確實影響到香港嘅國際形象。除此之外,旅遊、零售同飲食行業首當其衝,生意一落千丈,面對前所未有嚴峻嘅挑戰。
李慧琼已報名出戰區選九龍城土瓜灣北選區,同區參選人有社民連梁國雄。