【明報專訊】反修例運動以嚟，每逢有遊行集會，沿途都有店舖送水送食物打氣；另一邊廂，一班喺美國讀書嘅香港研究生早排成立「香港海外研究生民主聯盟」，組織成員、美國威斯康辛大學社會學博士研究生陳婉容(Sherry)噚日喺facebook發帖，話得到瑞典保安科技公司Yubico捐出500支「保安鎖匙Yubikey(小圖)」畀香港人，無論係用facebook?Google或Instagram，插住呢支匙先登入到，就無咁易被黑客入侵帳戶。 Sherry同Emily講，8月時膽粗粗寄電郵畀Yubico，話反修例風波下，抗爭嘅港人擔心電腦被入侵，Yubico唔夠一星期就回覆答應會支援。經過一番轉折，Sherry先託到香港朋友保管Yubikey，會免費分發畀大學校園記者、抗爭者等。 Yubikey係乜東東？Emily問過資訊保安專家范健文(Eric)，佢話Yubikey係「硬件雙重認證(hardware 2-factor authentication)」方式，原理似大家用網上理財，銀行會畀個保安編碼器，用戶登入除咗要輸入密碼，仲要入埋編碼器發放嘅號碼先登入到。Eric話硬件雙重認證的確比收手機短訊做「雙重驗證」安全，因為短訊可以被攔截，而呢條「保安匙」無接駁網絡，唔會被黑客入侵到，前提係大家要保管好條匙。
|
| |
| |
;){kind=small}
