【明報專訊】區議會選舉11月底舉行，「社區前進」5名社區主任噚日同傳媒茶敘，曾任工黨主席嘅胡穗珊話，反修例風波後選情未至於形勢大好，但運動強調「兄弟爬山」，以往出選區議會可能被質疑為份糧，但近日連登有網民呼籲出戰區選嘅人唔好去抗爭現場、要「留番條命」，認為大家開始見到不同位置嘅人嘅努力。

考慮出戰旺角南嘅朱江瑋就提及，曾目擊有市民去選舉事務處質問點解選民資格被取消，過往未見過，相信年底好多人會投票。旺角東社區主任林兆彬都話，有街坊以前投民建聯，但反修例風波後表明不滿政府，甚至叫佢幫手訂閱立場親泛民嘅媒體。

上次大南補選敗予經民聯李思敏嘅李國權，形容今次選情「審慎樂觀」，但政治一日都嫌長。佢敗選後檢討原因，包括認為過去同年輕人溝通不足，但近日區內時有警察放催淚彈，佢去現場支援街坊時識咗唔少年輕人，認為年輕人會企出嚟爭取關心嘅嘢。尖沙嘴中社區主任賀卓軒都話，自己過去認為區選投票係「浪費時間」，但年輕人其實唔係唔在意社區，亦唔希望建制派喺議會壟斷資源。