【明報專訊】2020年嘅渣打馬拉松賽事就嚟開始報名，其中達標跑手今日可以優先報名，渣馬官方facebook專頁早兩日出咗個post叫人準備，點知就引起好大迴響。正所謂「識睇一定係睇留言」，原來有唔少網民對於出年嘅馬拉松賽事有好多「疑慮」，又問咗大堆「特別要求」，唔少都劍指近日反修例運動中警方嘅執法手法。

「無跑手編號 無後顧之憂」

好似有網民問：「跑步嘅衣著本身無預留位置放號碼布，可否不顯示跑手編號？」有人就答：「無後顧之憂呀。」有人就擔心賽事安全，因為賽道正正位於警方經常施放催淚彈嘅路線，包括荃葵青、中環、西環、油尖旺，問大會可唔可以為選手提供「full gear」上陣。另外，網民亦擔心交通安排，話渣馬係大型群眾活動，怕港鐵到時會封晒全線，無車到。

留言充滿黑色幽默，最多人回應同Emily覺得最好笑嘅一句，係有人留言問「可唔可以安排一個或多個速龍系(喺)後面追我，我想攞冠軍」；又有人叫大會安排一場「攝記vs.速龍」嘅組別，認為攝記會跑得快啲，會跑贏喎。計Emily話，參賽選手一定要記住「不受傷」，先可以跑更遠嘅路，大家報名都要加油先爭到位。