【明報專訊】網上世界不時有假資訊，有時傳來傳去都未必咁易分到真假，民建聯噚日就澄清，話網上流傳一張有關該黨facebook專頁評論周日晚上眼部受傷女士嘅圖片「實為揑造」。而網上另一張廣傳嘅圖就指民建聯會務顧問、全國人大常委譚耀宗話「警射『誤中』眼睛不足為奇，呼籲市民體諒」，譚耀宗澄清自己無咁講，並深切慰問前日所有傷者，希望佢哋早日康復。

譚耀宗澄清，佢周日朝早接受商台訪問時，回應主持人說話時，佢提到警方過去兩個幾月真係疲於奔命，好多人休息時間都無，「我哋有時都要體諒，有時嗰一刻中裏面，電光火石，佢哋點樣判斷，或者有時有啲誤中，呢啲都唔出奇」。佢強調當時嘅回應並唔係討論個別事件，更唔係指噚日下晝發生嘅事。

前晚起另一張網傳嘅圖，就配有女示威者眼部流血倒地嘅相，指民建聯喺fb專頁話「好哋哋有人唔做 係要做曱甴 依家搞到毀埋容，警察well done」，民建聯澄清張圖係揑造，不過網民就繼續喺帖文留言貼出該圖，民記fb小編就不斷回應「這是揑造的假圖」。