【明報專訊】區議員處理地區大小事，區內一有突發事件都要報告畀居民聽，但稍一不慎，隨時攞分變扣分。南區區議員、新民黨陳家珮(Judy)噚日喺facebook上載幾張相，包括一張佢企喺消防車救護車前嘅自拍照，話海怡半島某座有婆婆墮樓，佢到場了解並等候「重案組」到場調查。

不過，帖文就引起網民批評，話佢唔尊重當事人及家人，質疑點解要走去墮樓現場自拍；有人仲重提菲律賓人質事件，批評Judy做法同菲律賓警察喺兇案現場、企喺旅遊巴前影相無異。

稱自拍時「未知咩事」 已刪帖

Judy之後承認自己敏感度唔夠，佢解釋話自拍照係佢發現消防車及救護車時影嘅，當時行緊去案發現場，未知發生咩事，了解事件後將所有相一齊放上網，希望盡快等居民知道件事。之後佢再解釋，話上載啲相之前未經深思，引起大家不安，係佢處理不當，深表歉意，仲刪埋相關帖文，又向逝者家屬致歉同深切慰問。