【明報專訊】立法會議員何君堯早排因為被人影到喺元朗同一班懷疑有參與元朗襲擊事件嘅人握手，引嚟大批市民去佢嘅議員辦事處抗議，唔知係唔係怕會造成更大影響，何君堯日前辭任屯門一個屋苑嘅業主立案法團管理委員會嘅義務法律顧問，話係想保障居民生活安靜。

屯門大興花園第二期業主立案法團管理委員會前日貼出告示，話收到何君堯嘅書面通知，即日起辭任義務法律顧問一職，解釋係因為「鑑於屋苑祥和氣氛不應受到外來政治因素影響」，希望保障居民生活安靜。法團管理委員會話接受何君堯嘅辭任，亦感謝佢喺過去多年為屋苑提供服務。Emily打過去屋苑管理處，職員確認有一個咁嘅告示，其他問題就叫我哋問番委員會，Emily搵咗兩日，都係未等到回覆。