【明報專訊】上月同黨友袁彌昌結婚嘅新民黨立法會議員容海恩(Eunice)，有無懷孕一直係個謎，謎底噚日由Eunice自行揭開，事關港台節目《城市論壇》噚日討論產假同男士侍產假，Eunice喺節目尾聲自爆「毫(如)無意外，(我)都會喺出年需要有產假」，承認有喜，引來台下一片起哄同恭賀掌聲。Eunice慨嘆立法會議員無產假放，係被剝削嘅一群，所以希望立法會將來可以實施產假咁話。 噚日開始時，主持蘇敬恆已經有意無意咁問Eunice「台上係咪有6個人」，言下之意，係台上除咗4名嘉賓同1名主持，應該仲有Eunice腹中肉，Eunice一度語塞，回應稱「到時你咪知」，蘇敬恆就笑住回應對方「個肚呃唔到人」。 41歲?Eunice喺節目上話，香港人口老化，政府有責任將法定產假由10周延長至14周，鼓勵婦女生育，政府亦應同僱主商量點樣分擔責任，尋求大家接受嘅方案。未知Eunice係咪有喜太開心，佢喺節目上不時將「14周」產假講錯做「14日」。Eunice下晝出席另一場活動時，話BB詳情要容後透露，問到係咪怕BB「小器」，佢就甜笑話「都係啦」。 同出席城市論壇嘅中原集團主席施永青，認同女性要兼任生育、照顧家庭同外出工作嘅職責，但認為要求商界承擔所有成本係「所託非人」。婦女事務委員會主席陳婉嫻就話，香港法定產假同侍產假日數落後鄰近亞太地區，認為增加日數係大勢所趨。
|
| |
| |
;){kind=small}
