【明報專訊】講述中年男人挑戰嘅港產片《逆流大叔》正上映，口碑唔錯，似乎亦引起立法會唔少中年議員嘅共鳴，最近有張「大叔進化度」嘅圖喺網上熱傳，列出12項「大叔」特徵，就吸引?專業議政嘅梁繼昌、邵家臻等轉載，梁繼昌自言中咗3項特徵。

12項特徵包括﹕會留意防脫髮廣告、搭公共交通工具時校服少女自動彈開、成日講「而家啲後生」、沉迷80及90年代嘅任何產物、玩通頂同瞓覺之間寧願揀瞓覺等。梁繼昌喺facebook轉載圖片，自稱中咗3項，莫乃光就話自己中咗4項，仲叫梁繼昌估吓係邊幾樣；梁就估莫乃光符合嘅「大叔」特徵，包括有去唱K但新歌試唱頭1000頁都唔識、一邊怨自己肥一邊煮麵消夜等。

社福界邵家臻亦轉載圖片，形容自己49歲，係「如假包換的大叔」，話早前眼花撩亂，以為《逆流大叔》係「逆權大叔」，糊裏糊塗一個人入場睇呢套戲，佢形容套戲可以話係大叔嘅典型寫照，又話套戲教「我等大叔」要搵到屬於自己嘅鼓聲，按自己節奏、唔好亂，一下一下向前行就搞掂。